星期日，又講下D無聊野。
其實因為開左個Page，我同多左好多年輕人分享交流投資理財心得。我一直唔標榜自己投資好了得，因為我真係唔算炒得好貼市，我會投資嘅股票亦唔多，因為我係唔熟唔買的。
而我係「奧坎剃刀原則」（Occam's razor）嘅支持者，我可以識好多技巧同理論，但我會盡可能將自己既投資方法簡化，簡單直接最有效。其實唔單單係年輕人，所有人其實都係一樣，要唔遲遲唔開始理財計劃嘅人總有一萬個理由，搵得少，條數太細幫唔到D乜，我真係聽好多。
我由2016年年尾開始寫Blog叫大家儲錢，由月供股票學起。
我當大家由2017年1月開始供823，亦當大家唔供得多，一個月供$3000。到2019年6月，你已經儲左$128540，當中你真正投入嘅資金係$90000，即係你已經賺左$38540被動收入，都已經未計派息。
大家要唔儲可以繼續俾藉口自己，畢竟人生只向自己負責。你可能同我講，香港地好絕望，200萬人上街政府唔理，點有心情搞呢D野?喂！真係講左九十幾，如果香港真係咁絕望，你要走佬去台灣，都要150萬。你愛香港612你訓身支持運動，你知唔知3萬8千幾可以買到幾多枝生理鹽水，洗到幾多對被警方催淚彈煙到紅哂嘅眼睛？這是你本來該有用來保護香港，保護你身邊人嘅能力啊！祝大家有個愉快嘅星期日！
#明天準備行街 #我想去海邊行下
Search